Konferenca Ndërkombëtare e Shëndetit Publik “Determinantët Socialë të Shëndetit”
12 Maj 2015
——————————————————————————————————————–
Me datë 12 Maj 2015, në Tiranë u organizua Konferenca Ndërkombëtare e Shëndetit Publik, me temë: Determinantët Socialë të Shëndetit. Konferencën e hapi drejtori i Institutit të Shëndetit Publik, Dr. Arjan Bregu dhe e përshëndeten Ministri i Shëndetësisë, Z. Ilir Beqaj, ambasadori i SHBA në Shqipëri, Z. Donald Lu, Përfaqësuesi i Federatës Botërore të Shoqatave të Shëndetit Publik, Prof. Ulrich Laaser, Koordinatorja e Përhershme e Kombeve të Bashkuara, Znj. Zineb Touimi-Benjelloun si dhe dekani i Fakultetit të Shëndetit Publik, Prof. Enver Roshi. Gjithashtu, i ftuar special në konferencë ishte edhe përfaqësuesi i zyrës Europiane të OBSH-së në Kopenhagen, Z. Richard Alderslade.
Dy problematikat kryesore që u diskutuan në konferencë përmblidhen shkurtimisht më poshtë:
- Adresimi i determinantëve socialë të shëndetit cilët ndihmojnë në realizmin e matjes dhe raportimit të pabarazive shëndetësore. Një gjë e tillë i siguron politikë-bërësve të dhëna të vlefshme për hartimin dhe zbatimin e programeve dhe aktiviteteve të fokusuara në barazi, që mund të jenë të realizueshëm në kontekstin Shqiptar. Qëllimi final i ndërhyrjeve që adresojnë determinantët socialë është i lidhur edhe me garantimin e një shpërndarjeje më të barabartë të shërbimeve shëndetësore dhe aksesit ndaj kujdesit shëndetësor, si parakushte thelbësore për mbulimin shëndetësor universal të popullatës Shqiptare.
- Forcimi i sistemit të informacionit shëndetësor në Shqipëri. Mbi këtë truall, Instituti i Shëndetit Publik, në statusin e gjeneratoratorit të evidencës shkencore, fakteve dhe informacionit shkencor, do të punojë për hartimin e një seti indikatorësh shëndetësorë, të shoqëruar me një manual i cili do të udhëzojë implementimin dhe do të informojë politikë-bërësit dhe vendim-marrësit me qëllimin final përmirësimin gradual dhe të qëndrueshëm të gjendjes shëndetësore të popullatës si dhe të rritjes së efektivitetit dhe të performancës së sistemit shëndetësor në vendin tonë.
Në rekomandimet e shprehura në përfundim të konferencës u theksua roli që ka bashkëpunimi me institucionet e tjera për adresimin më të mirë të determinantëve socialë të lidhura me shëndetin dhe pabarazitë në shëndet. Gjithashtu u rekomandua që në konferencën e ardhshme të Shëndetit Publik të përfshihen dhe kontribuojnë më shumë ekspertë nga vendet e Ballkanit.
