Informacioni dhe këshilla rreth virusit të Nilit Perëndimor
VIRUSI I NILIT PERËNDIMOR
Si transmetohet infeksioni nga virusi i Nilit Perëndimor?
Infeksioni te njeriu është kryesisht rezultat i pickimeve nga mushkonjat e infektuara, të cilat infektohen kur ushqehen me zogj të infektuar. Virusi qëndron në natyrë nëpërmjet një cikli transmetimi mushkonja-zogj-mushkonja. Zogjtë janë “rezervuarët” bartës të virusit. Kuajt, njësoj si njerëzit, janë bartës – jo përhapës direkt të infeksionit, pavarësisht nëse infektohen. Deri më sot, nuk ka ndodhur asnjë transmetim i virusit të Nilit Perëndimor nga njeriu tek njeriu përmes kontaktit rastësor apo nëpërmjet mushkonjave dhe gjithashtu, nuk është raportuar asnjë rast i transmetimit të virusit te punonjësit e kujdesit shëndetësorë kur janë zbatuar masa parandaluese standarde të kontrollit të infeksionit.
Çfarë shenjash ka infeksioni nga virusi i Nilit Perëndimor?
Infeksioni me virusin e Nilit Perëndimor është pa shenja në rreth 80% të njerëzve të infektuar, dhe vetëm rreth 20% e njerëzve të infektuar me këtë virus zhvillojnë sëmundjen. Kur shfaqen shenjat ato përfshijnë: ethe, dhimbje koke, lodhje, dhimbje trupore, të përziera, të vjella, herë pas here skuqje të lëkurës dhe fryrje të gjëndrave limfatike.
Shenjat e sëmundjes së rëndë (si encefaliti, meningiti ose paraliza flakside akute) përfshijnë: dhimbje koke, temperaturë të lartë, ngurtësim të qafës, mpirje, çorientim, gjendje kome, dridhje, konvulsione, dobësi muskulore, paralizë dhe shfaqen vetëm në 1% të personave të infektuar.
Forma të rënda të sëmundjes mund të shfaqen te njerëzit e çdo moshe, por personat mbi 60 vjeç dhe personat me imunitet të ulët janë më të rrezikuarit. Periudha e inkubacionit është zakonisht nga 3 – 14 ditë.
Si vendoset diagnoza?
Virusi i Nilit Perëndimor mund të diagnostikohet me një sërë testesh duke analizuar lëngun trunoshpinor, urinën, gjakun apo mostrat e serumit të marra nga pacientët e infektuar me këtë virus në periudhën kur paraqesin shenja klinike.
Trajtimi
Nuk ka trajtim specifik për pacientët me sëmundjen që prek sistemin nervor – shkaktuar nga virusi i Nilit Perëndimor. Trajtimi është vetëm mbështetës dhe simptomatik.
Parandalimi
Kufizimi i rrezikut të infektimit te njerëzit.
Në mungesë të një vaksine, e vetmja mënyrë për të zvogëluar infektimin e njerëzve është rritja e ndërgjegjësimit mbi faktorët e rrezikut, dhe edukimi i tyre për masat që duhet të ndërmarrin për të zvogëluar ekspozimin ndaj virusit.
Kontrolli i mushkonjave
Parandalimi efektiv i infeksionit nga virusi i Nilit Perëndimor te njeriu, varet nga programet e kontrollit të integruar të mushkonjave në zonat ku ndeshet virusi.
Parandalimi i infeksionit në mjediset e kujdesit shëndetësor
Punonjësit e kujdesit shëndetësorë që kujdesen për pacientët që dyshohet ose që konfirmohet se kanë infeksion të virusit të Nilit Perëndimor, ose që trajtojnë mostra prej tyre, duhet të zbatojnë masat e pergjithshme të kontrollit të infeksionit.
Parandalimi i transmetimit të virusit në kuaj dhe zogj.
Meqenëse shpërthimet e virusit të Nilit Perëndimor në kafshë i paraprijnë rasteve të infektimeve në njerëz, krijimi i një sistemi mbikëqyrës të shëndetit të kafshëve për zbulimin e rasteve të reja në zogj dhe kuaj, është thelbësor për paralajmërimin e hershëm të autoriteteve të shëndetit publik dhe veterinar.